🔥 തലച്ചോറിൽ അറിവിന്റെ അഗ്നി നിറയട്ടെ 🔥

രചന : മരിയ തോപ്പിൽ ✍

പഠനമുറികളിൽ
കരിനിഴലുകളായി
നുഴഞ്ഞുകയറി,
വിലപേശലിന്റെ
വലക്കണ്ണികൾ
നെയ്തുകൂട്ടി,
മാരകമാം ലഹരി
വില്ക്കുന്നു
ഹാ.. പണം
പാളം തെറ്റിയ മനസ്സിന്റെ
പഠനം മുറിയുന്നു…
മയക്കത്തിൽ മറയുന്നു
ലക്ഷ്യവും പ്രതീക്ഷയും.
തലച്ചോറിൽ
അഗ്നിസ്പുലിംഗങ്ങളായ്
മിന്നാമിനുങ്ങുപോൽ മിന്നി,
അർദ്ധബോധാവസ്ഥയിൽ
വിഭ്രമചിത്തനായി
നേരേത് നെറിയേതെന്നറിയാതെ
അഹങ്കാരമലറി വിളിച്ച്,
ദിവ്യപ്രേമത്തെ
കശക്കിയെറിയുന്നു
യൗവനത്തിന്റെ
വസന്തഭൂമി
ജയിലറയ്ക്കുള്ളിൽ
നരകമായി മാറുന്നു
തങ്കക്കനവുകൾ നിറയേണ്ട
നെഞ്ചകം.
കരിനിഴൽ മൂടി
ശ്മശാനമാകുന്നു
നുകരുന്ന ലഹരി
സിരകളിലൊഴുകി
മസ്തിഷ്കം
ലാവയായി പൊട്ടിത്തകരുന്നു.
സൗഹൃദങ്ങളകലുന്നു,
കർമ്മബന്ധങ്ങളറ്റുപോകുന്നു.
ഹിംസയ്ക്കു മടിക്കില്ല;
വാളെടുക്കുന്നു…
പെറ്റമ്മതൻ കണ്ണീർ
കാണാതെയാ
മുത്തമിട്ട കവിളിൽ
ആഞ്ഞാഞ്ഞടിക്കുന്നു
താതന്റെ നെടുവീർപ്പ്
കേൾക്കാതെ.
ചവിട്ടി മെതിക്കുന്നു
കൂടപ്പിറപ്പുകൾ
ഭയന്നു വിറയ്ക്കുന്നു
കണ്ണീർക്കടലായി
മാറുന്നു ഗേഹം
വിഷസർപ്പമായവൻ
വിഹരിക്കുന്നു.
രാജസേവകർ
ഒത്താശ ചെയ്ത്
തങ്കനാണയങ്ങൾ
കൈക്കലാക്കുമ്പോൾ,
വിഷം പടരുന്നു
നാടിന്റെ നാഡികളിലൂടെ.
ആയുധവ്യവസായം
ഒന്നാമനാകുമ്പോൾ,
യുവമസ്തിഷ്കത്തെ
അദൃശ്യമായി
കാർന്നുതിന്നുന്ന അമീബയായി
ലോക ലഹരിമാഫിയ
രണ്ടാമനായ-
രങ്ങു വാഴുന്നു.
നിശബ്ദയാമൊരു
കാഴ്ചക്കാരിയാകാൻ
ആവില്ലെനിക്കിനി..
യുവനിണം തിളയ്ക്കണം
സ്വപ്നങ്ങളിലറിവിന്റെ
അഗ്നി നിറക്കണം
മസ്തിഷ്ക്കം തിളച്ച്
ഭാവിക്കായി
പടപൊരുതണം;
അധോലോക കിങ്കരന്മാരുടെ
നിഗൂഢയിടങ്ങൾ തേടി,
വിഷവേരുകൾ
പിഴുതെറിഞ്ഞ്,
മണ്ണിൽനിന്നവരുടെ
പാടു പാടേ മായ്ക്കണം.
യുവതേ…
നിൻ കൈകളിലാണ്
നാളെയുടെ പുലരികൾ…