🌹🌹പൂക്കളങ്ങൾ 🌹🌹

രചന : എം പി ശ്രീകുമാർ ✍️

അത്തപ്പൂക്കളമിട്ടു നല്ല
ചെത്തിപ്പൂക്കളുമൊന്നിച്ച്
അന്നേരത്തമ്മ പറഞ്ഞു
” നമ്മൾക്കോണം വന്നല്ലൊ”
ചിത്തിരനാളിൽ പൂക്കളമിട്ടു
മത്തപ്പൂക്കളും ചേർത്തിട്ട്
ചിത്തത്തിൽ നിന്നാരൊ തുള്ളി
മുത്തം കവിളിൽ വച്ചല്ലൊ
ചോതിപ്പൂക്കളമിട്ടു ചേലിൽ
ചുവപ്പു പൂക്കൾ നിരത്തീട്ട്
ചോദിച്ചാരൊ ഇന്നെന്തിത്രേം
ചോരത്തിളപ്പു വന്നെന്ന്
കാശിനു വാങ്ങിയ പൂവുകളാൽ
വിശാഖത്തിൽ കളമിട്ടു
കാശിത്തുമ്പ കൊണ്ടതിലായി
കാന്തി ചൊരിയും പൊട്ടിട്ടു
അനിഴത്തിൽ കളമിട്ടതു
ആമ്പൽ പൂക്കളും ചേർത്തിട്ട്
ആരതി പോലെ ശോഭ തൂകി
യന്നു മന്ദിരാങ്കണം !
കേട്ടയിലിട്ട പൂക്കളിലുണ്ട്
കേട്ടുകേൾവിയില്ലാത്തതും
മൂലം നാളിലെ പൂക്കളം കണ്ടൊ
മൂവന്തിയ്ക്കും വാടീല്ല !
പൂരാടത്തിൻ കളം കണ്ടാൽ
പൂന്തിങ്കളൊന്നു കണക്കെ
പുലർവെയിൽ നാളം വന്നിട്ടപ്പോൾ
പുണരുന്നല്ലൊ മെല്ലെ !
ഉത്രാടപ്പൂക്കളമെത്ര
ഉത്തമകാന്തി വിതറുന്നു
ഉല്ലസിച്ചു തെന്നൽ പോലും
ഊഞ്ഞാലാടി വന്നു
തിരുവോണപ്പൂക്കളത്തിൽ
ഓമനപ്പൂവുകളെല്ലാം
നിറച്ചു വച്ചലങ്കരിച്ചു
നിവർന്നുനില്ക്കുന്നേരം
പടികടന്നുവരുന്നതാ
പൊന്നുമാവേലിത്തമ്പുരാൻ !!