🔥🔥ചിതാഗ്നിയുടെ ചുംബനം🔥🔥

രചന : തെന്നൂർ രാമചന്ദ്രൻ ✍️

പരിക്ഷീണിതൻ ഞാൻ പക്ഷങ്ങൾ മുറിഞ്ഞോൻ
അരക്ഷണം മാത്രം ജീവിതബാക്കിപത്രം
പരാശ്രയത്തിൻ പടിയ്ക്കൽ നിൽക്കുന്നവൻ
തിരോധാനത്തിൻ മണിമുഴക്കം കേൾക്കാം

ആത്മാഭിമാനം ജന്മാവകാശമെങ്കിലും
ആത്മഹത്യാവാസനസ്വയംഭൂവായ് വരും
കാസയേന്തും കൈകളിൽ കരുണയുണ്ടോ
ശ്വാസം നിലയ്ക്കാതിരിക്കാൻ കരുതലും

അന്ത്യാഭിലാഷമാരായുന്നതാരാകിലും
മുന്തിരിച്ചാറിൻ കോപ്പ നീട്ടാതിരിക്കണം
അന്ത്യശ്വാസത്തിലെ പ്രാരബ്ധഭാണ്ഡങ്ങൾ
കുന്തിരിക്കം പുകച്ചാൽ തീരുന്നതാണേ

ദാഹജലമിറ്റിച്ചു നൽകുന്നതല്ലോ
സോഹപ്രകാര ജീവാനുകമ്പാമൃതം
പ്രാണപ്രിയേ നീയെൻ്റെയരികിലെത്തി
പുണ്യപ്രദായക നാമാക്ഷരം ചൊല്ലണം

നിൻ നേത്രദ്യുതിയിലെച്ചന്ദനക്കുളിർ
സന്തർപ്പണപ്പന്തലായ് തണലേകണം
മന്ദാനിലൻ മറന്നേ പോകിലും നിൻ്റെ
കുന്ദദന്തസ്‌മിതം കാണുമാറാകണം

സമ്പാതിയെപ്പോൽ ശ്രീരാമ കരസ്പർശം
സമ്പാദനംചെയ്യുവാൻ പുണ്യം ബാക്കിയുണ്ടോ
പുണ്യാതിരേകങ്ങളുദ്യാനപുഷ്പങ്ങൾ
സന്നം വരാത്തകർമ്മജന്യപ്പൂവുകൾ

സ്മരാമിപ്രരോദനപ്പാട്ടു പാടുവാൻ
ഹരേർ നാമസങ്കീർത്തനം സ്‌മരിക്കാൻ
ദ്രവ്യപ്രസാദ ശബ്ദഗായത്രിയോതാൻ
സാവനത്തേൻ ധാര പെയ്തിറങ്ങേണം

കാവ്യപുസ്തകത്താളിലേക്കെൻ പ്രാണനെ
ത്തൂവണം, പക്ഷങ്ങൾ നവം ജനിക്കുമപ്പോൾ
ചിത്തിരത്തോണിയിൽ നിശ്ചല നിദ്രയിൽ
പുത്തൻ കരുത്തിൽ മധുഛന്ദസ്സാകും ഞാൻ