🇮🇳ഡോക്ടർ എപിജെ അബ്ദുൽ കലാമിന്റെ ജന്മദിനം: ഒക്ടോബർ 15- ലോക വിദ്യാഭ്യാസ ദിനം🇮🇳

രചന : സജീവ് ഓയൂർ ✍

🇮🇳ഭാരതരത്നം ഡോ. എ.പി.ജെ. അബ്ദുൽ കലാമിന്റെ പേര് കേൾക്കുമ്പോൾ തന്നെ ഒരു രാജ്യത്തിന്റെ മുഴുവൻ സ്വപ്നങ്ങളും കണ്ണിൽ തെളിഞ്ഞു വരും. ശാസ്ത്രസാങ്കേതിക രംഗത്തും ഭരണരംഗത്തും ഒരുപോലെ തിളങ്ങി നിന്ന അദ്ദേഹം, തന്റെ ലളിതമായ ജീവിതം കൊണ്ടും ഉദാത്തമായ ചിന്തകൾ കൊണ്ടും കോടിക്കണക്കിന് മനുഷ്യർക്ക്, പ്രത്യേകിച്ച് വിദ്യാർത്ഥികൾക്ക് എന്നും പ്രചോദനമാണ്.
1931 ഒക്ടോബർ 15 ന് തമിഴ്നാട്ടിലെ രാമേശ്വരം എന്ന തീരദേശ പട്ടണത്തിലെ ഒരു സാധാരണ തമിഴ് മുസ്ലിം കുടുംബത്തിലാണ് അവുൽ പകീർ ജൈനുലാബ്ദീൻ അബ്ദുൽ കലാം ജനിച്ചത്. തോണി നിർമ്മിച്ച് വാടകയ്ക്ക് കൊടുക്കുന്ന ജോലിയായിരുന്നു പിതാവ് ജൈനുലാബ്ദീന്. മാതാവ് ആഷിയമ്മ. അച്ചടക്കത്തിന്റെയും സത്യസന്ധതയുടെയും ആത്മീയതയുടെയും പാഠങ്ങൾ വീട്ടിൽ നിന്ന് തന്നെ കലാം പഠിച്ചു.

കുട്ടിക്കാലം ദാരിദ്ര്യം നിറഞ്ഞതായിരുന്നു. കുടുംബത്തെ സഹായിക്കാനും പഠനച്ചെലവിനുമായി പുലർച്ചെ എഴുന്നേറ്റ് രാമേശ്വരം റെയിൽവേ സ്റ്റേഷനിൽ നിന്ന് പത്രം എടുത്ത് വീടുകളിൽ എത്തിച്ചിരുന്ന ഒരു ബാലനായിരുന്നു അദ്ദേഹം. രാമേശ്വരത്തെ പ്രാഥമിക വിദ്യാഭ്യാസത്തിന് ശേഷം തിരുച്ചിറപ്പള്ളി സെന്റ് ജോസഫ്സ് കോളേജിൽ നിന്ന് ഭൗതികശാസ്ത്രത്തിൽ ബിരുദം നേടി. പിന്നീട് സ്വപ്നം പോലെ കൊണ്ടുനടന്ന പറക്കലിനോടുള്ള പ്രണയം കൊണ്ടാണ് ചെന്നൈയിലെ മദ്രാസ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ എയറോസ്പേസ് എഞ്ചിനീയറിംഗിന് ചേർന്നത്. ഒരു യുദ്ധവിമാന പൈലറ്റ് ആകാൻ ആഗ്രഹിച്ച് എയർഫോഴ്സ് ഇന്റർവ്യൂവിൽ പോയി ഒമ്പതാം സ്ഥാനത്ത് പരാജയപ്പെട്ടതാണ് കലാമിന്റെ ജീവിതത്തിലെ വലിയ വഴിത്തിരിവ്. ആ പരാജയമാണ് ഇന്ത്യയ്ക്ക് ഒരു മിസൈൽ മാനെ സമ്മാനിച്ചത്.

ബിരുദത്തിന് ശേഷം അദ്ദേഹം ആദ്യം പ്രതിരോധ ഗവേഷണ സ്ഥാപനമായ DRDO യിലും പിന്നീട് ഇന്ത്യൻ ബഹിരാകാശ ഗവേഷണ സ്ഥാപനമായ ISRO യിലും എത്തി. ISRO യുടെ ചരിത്രം തന്നെ കലാമില്ലാതെ എഴുതാൻ കഴിയില്ല. ഇന്ത്യയുടെ ആദ്യത്തെ തദ്ദേശീയ ഉപഗ്രഹ വിക്ഷേപണ വാഹനമായ SLV-III യുടെ പ്രോജക്ട് ഡയറക്ടറായിരുന്നു അദ്ദേഹം. നിരവധി പരാജയങ്ങൾക്ക് ശേഷം 1980 ജൂലൈ 18 ന് രോഹിണി ഉപഗ്രഹത്തെ വിജയകരമായി ഭ്രമണപഥത്തിൽ എത്തിച്ചപ്പോൾ ഇന്ത്യ ബഹിരാകാശ ക്ലബ്ബിൽ അംഗമായി. പിന്നീട് വീണ്ടും DRDO യിലേക്ക് തിരിച്ചെത്തിയ കലാം, ഇന്ത്യയുടെ സംയോജിത മിസൈൽ വികസന പരിപാടിയായ IGMDP ക്ക് നേതൃത്വം നൽകി. ഇതിലൂടെയാണ് നമ്മുടെ രാജ്യത്തിന് സ്വന്തമായി അഗ്നി, പൃഥ്വി, ആകാശ്, തൃശൂൽ, നാഗ് എന്നീ മിസൈലുകൾ സ്വന്തമായത്. അതാണ് അദ്ദേഹത്തിന് ഇന്ത്യയുടെ മിസൈൽ മനുഷ്യൻ എന്ന പേര് നേടിക്കൊടുത്തത്. 1998 ലെ പൊഖ്റാൻ – II ആണവ പരീക്ഷണത്തിന്റെ മുഖ്യ ശില്പികളിൽ ഒരാളും കലാമായിരുന്നു, അത് ഇന്ത്യയെ ലോകത്തിലെ ആണവശക്തികളുടെ നിരയിലേക്ക് ഉയർത്തി.
എന്നാൽ കലാമിന്റെ സംഭാവനകൾ യുദ്ധരംഗത്ത് മാത്രം ഒതുങ്ങുന്നില്ല. പ്രശസ്ത ഹൃദ്രോഗ വിദഗ്ധൻ ഡോ. ബി. സോമരാജുവിനൊപ്പം ചേർന്ന് സാധാരണക്കാരന് താങ്ങാവുന്ന വിലയിൽ കൊറോണറി സ്റ്റെന്റ് അദ്ദേഹം വികസിപ്പിച്ചു, അതാണ് കലാം-രാജു സ്റ്റെന്റ് എന്നറിയപ്പെടുന്നത്. മിസൈലുകൾക്ക് ഉപയോഗിക്കുന്ന ഭാരം കുറഞ്ഞ കാർബൺ വസ്തുക്കൾ ഉപയോഗിച്ച് പോളിയോ ബാധിതരായ കുട്ടികൾക്കായി വെറും 300 ഗ്രാം മാത്രം ഭാരമുള്ള കാലുറപ്പ് അദ്ദേഹം രൂപകൽപ്പന ചെയ്തു. ഇന്ത്യയെ 2020 ഓടെ വികസിത രാജ്യമാക്കാനുള്ള വിഷൻ 2020 എന്ന സ്വപ്നരേഖയും, ഗ്രാമങ്ങളിൽ നഗര സൗകര്യങ്ങൾ എത്തിക്കാനുള്ള PURA എന്ന ആശയവും അദ്ദേഹത്തിന്റെ ദീർഘവീക്ഷണത്തിന്റെ തെളിവുകളാണ്.

ഈ ശാസ്ത്ര പ്രതിഭയെ 2002 ൽ രാജ്യം പതിനൊന്നാമത് രാഷ്ട്രപതിയായി തിരഞ്ഞെടുത്തു. രാഷ്ട്രീയ പശ്ചാത്തലം ഇല്ലാതെ ആ സ്ഥാനത്ത് എത്തിയ അദ്ദേഹം രാഷ്ട്രപതി ഭവനെ ജനങ്ങളിലേക്ക് കൂടുതൽ അടുപ്പിച്ചു. അതുകൊണ്ടാണ് അദ്ദേഹം ജനങ്ങളുടെ രാഷ്ട്രപതി എന്ന് അറിയപ്പെട്ടത്. രാഷ്ട്രപതി ഭവനിലെ തന്റെ മുറിയിൽ വീണ വായിക്കുകയും, സസ്യാഹാരം മാത്രം കഴിക്കുകയും, സ്വന്തം സമ്പാദ്യം മുഴുവൻ പൊതു കാര്യങ്ങൾക്കായി നൽകുകയും ചെയ്ത ആ ലാളിത്യം ലോകത്തിന് തന്നെ അത്ഭുതമായിരുന്നു.
രാഷ്ട്രപതി സ്ഥാനത്തിന് ശേഷവും അദ്ദേഹം അധ്യാപനം തുടർന്നു. താൻ ഒരു ശാസ്ത്രജ്ഞനോ രാഷ്ട്രപതിയോ അല്ല, ഒരു അധ്യാപകനായാണ് അറിയപ്പെടാൻ ആഗ്രഹിക്കുന്നതെന്ന് അദ്ദേഹം എപ്പോഴും പറയുമായിരുന്നു. ലക്ഷക്കണക്കിന് വിദ്യാർത്ഥികളുമായി അദ്ദേഹം നേരിട്ട് സംവദിച്ചു. 2015 ജൂലൈ 27 ന് മേഘാലയയിലെ ഷില്ലോങ്ങിലെ ഐ.ഐ.എമ്മിൽ വിദ്യാർത്ഥികൾക്ക് ‘വാസയോഗ്യമായ ഒരു ഗ്രഹം സൃഷ്ടിക്കൽ’ എന്ന വിഷയത്തിൽ ക്ലാസ് എടുത്തുകൊണ്ടിരിക്കെ ഹൃദയാഘാതം മൂലം അദ്ദേഹം ഈ ലോകത്തോട് വിടപറഞ്ഞു. അവസാന നിമിഷം വരെ ഒരു അധ്യാപകനായി ജീവിക്കാൻ കഴിഞ്ഞു എന്നതാണ് അദ്ദേഹത്തിന്റെ ജീവിതത്തിന്റെ ഏറ്റവും വലിയ ധന്യത.

വിദ്യാർത്ഥികളോടുള്ള അദ്ദേഹത്തിന്റെ ഈ അദമ്യമായ സ്നേഹം കണ്ടാണ് 2010 ൽ ഐക്യരാഷ്ട്രസഭ അദ്ദേഹത്തിന്റെ ജന്മദിനമായ ഒക്ടോബർ 15 ലോക വിദ്യാർത്ഥി ദിനമായി പ്രഖ്യാപിച്ചത്. ഇത് വെറുമൊരു ആഘോഷമല്ല. ഓരോ വിദ്യാർത്ഥിയും സ്വയം ഓർമ്മിക്കേണ്ട ദിവസമാണ്.
അദ്ദേഹം പറഞ്ഞിട്ടുണ്ട്, സ്വപ്നം കാണുക, സ്വപ്നങ്ങൾ ചിന്തകളായി മാറും, ചിന്തകൾ പ്രവൃത്തിയായി മാറും എന്ന്. ഉറക്കത്തിൽ കാണുന്നതല്ല സ്വപ്നം, നമ്മെ ഉറങ്ങാൻ അനുവദിക്കാത്തതാണ് യഥാർത്ഥ സ്വപ്നം എന്ന അദ്ദേഹത്തിന്റെ വാക്കുകൾ ഇന്നും ഓരോ ക്ലാസ് മുറികളിലും മുഴങ്ങുന്നു. വിദ്യാഭ്യാസം കൊണ്ട് മാത്രമേ ഒരു സാധാരണക്കാരന് രാഷ്ട്രപതി ഭവൻ വരെ എത്താൻ കഴിയൂ എന്ന് സ്വന്തം ജീവിതം കൊണ്ട് തെളിയിച്ച അദ്ദേഹം, വിജയിക്കാൻ കഠിനാധ്വാനത്തിന് പകരം വെക്കാൻ മറ്റൊന്നില്ല എന്നും പഠിപ്പിച്ചു. അറിവിനൊപ്പം നന്മയുള്ള മനുഷ്യനാകണം എന്നതായിരുന്നു അദ്ദേഹത്തിന്റെ പ്രധാന സന്ദേശം.

വിങ്സ് ഓഫ് ഫയർ, ഇഗ്നൈറ്റഡ് മൈൻഡ്സ്, ഇന്ത്യ 2020 തുടങ്ങിയ അദ്ദേഹത്തിന്റെ പുസ്തകങ്ങൾ ഇന്നും യുവതലമുറയുടെ വഴികാട്ടിയാണ്. ഭാരതരത്നം, പത്മവിഭൂഷൺ, പത്മഭൂഷൺ എന്നീ പരമോന്നത ബഹുമതികൾ രാജ്യം അദ്ദേഹത്തിന് നൽകി. എന്നാൽ ആ ബഹുമതികളെക്കാൾ വലുതാണ് കോടിക്കണക്കിന് വിദ്യാർത്ഥികളുടെ ഹൃദയത്തിൽ അദ്ദേഹം ഇന്നും ജീവിക്കുന്നു എന്നത്. രാമേശ്വരത്തെ മണൽത്തരികളിൽ നിന്ന് രാഷ്ട്രപതി ഭവനിലേക്കുള്ള അദ്ദേഹത്തിന്റെ യാത്ര, എല്ലാ വിദ്യാർത്ഥികൾക്കും ഇത് സാധ്യമാണ് എന്ന ഓർമ്മപ്പെടുത്തലാണ്. അതുകൊണ്ടാണ് ഒക്ടോബർ 15 ലെ വിദ്യാർത്ഥി ദിനം ഓരോ വിദ്യാർത്ഥിയും തന്റെ സ്വപ്നങ്ങളെ പുതുക്കുന്നതിനുള്ള പ്രതിജ്ഞയായി മാറുന്നത്.