👑മഹാഗൗരീ, മനസ്സാൽ നമിക്കുന്നു👑

രചന : കൃഷ്ണ മോഹൻ കെ പി ✍

അഷ്ടവസുക്കളും, അഷ്ടദിക്പാലന്മാരും
അഷ്ടലക്ഷ്മിയും, നിന്നെ,വണങ്ങിത്താൻ നിന്നീടുന്നൂ
എട്ടാം നാളെത്തുന്ന നിൻപാദാരവിന്ദങ്ങളിൽ
അഷ്ടമംഗല്യം ചാർത്തിയലങ്കരിച്ചൊരുക്കുവാൻ
ഭക്തർ തൻ ദു:ഖങ്ങളെയകറ്റി, ദയാപൂർണേ
ഭക്തൻ്റെ കാമന നീ പൂർത്തീകരിച്ചീടുന്നൂ
ചതുർബാഹുധരിക്കുന്ന ചതുരയാം മഹാദേവീ
ഡമരുവും, ശൂലവും നീ കൈയേന്തി നില്പൂ നിത്യം
വിശ്വനാഥനെത്തന്നെ, പതിയായി ലഭിക്കാൻ നീ
വിശ്വനായികേ, ദീർഘതപസ്സങ്ങനുഷ്ഠിക്കേ
മൃണ്മയമായീ നിൻ്റെ മോഹന കളേബരം
മൃത്യുഞ്ജയൻ ഗംഗാതീർത്ഥത്തിനാലേ നിന്നെ
അഭിഷേകം ചെയ്കയാൽ നീ മോഹനരൂപയായി
അത്യന്തം ശുഭ്രമായീ ദേഹവും വസനവും
അത്ഭുതകാന്തി നേടീ,
നിർമലത്വവുമായ് ദേവീ മഹാഗൗരീ
വെള്ളയാം വസ്ത്രങ്ങളും, ആഭരണങ്ങളുമായി
വെള്ളക്കാളപ്പുറമേറി വന്നെത്തിജ്ജഗത്തിനെ,
വെണ്മയിലാറാടിക്കാൻ, വൈരത്തെയൊഴിപ്പിക്കാൻ
സംഗീത സാഹിത്യാദി കലകൾക്കു ഗുണമേറ്റാൻ
സത്ക്കലാവിശാരദേ സകലത്തിൻ ജഗന്മാതേ
സന്തോഷപൂർവം മഹാ ഗൗരിയായ് മരുവുന്നു
സാക്ഷാൽ ശ്രീ പരമേശപത്നിയായ് വിളങ്ങുന്ന
സന്തോഷപ്രദേ, ഗൗരീ, സന്തതം നമിക്കുന്നേൻ🙏