🌷 മഹാത്മാ .. അയ്യൻകാളി

രചന : അൻവർ ഷാ ഉമയനല്ലൂർ✍️

ജ്ഞാനബോധത്തെയുണർത്തിയധഃസ്ഥിത-
ജനതയ്ക്കൊരാത്മ ധൈര്യത്തിൻ പ്രതീക്ഷയായ്
നിലകൊണ്ടൊരാർദ്ര മനസ്സിൻ മഹാ ധർമ്മ-
മിന്നും സ്മരിപ്പി താ,യഭിമാന കേരളം.
മഹാത്മാ അയ്യൻകാളിതൻ ശ്രമഫലം
മഹാത്യാഗ സന്നദ്ധ സന്മാർഗ്ഗ ബോധനം
കൈരളിക്കഭിമാന സൂര്യപ്രതീകമായ്
നിത്യം നിറയുമാ, ദീപ്ത സ്മരണയും.
വഴിവിളക്കായ്, കർമ്മ സവിശേഷ സിദ്ധിയായ്
സ്തുത്യാദർശ മനോജ്ഞമാം ചിന്തയാൽ;
അവഗണനയ്ക്കറുതിയായെന്നുറപ്പാക്കാൻ
സദാ ജാഗരൂകമായ് പ്രവർത്തിച്ച ഹൃദയമേ,
ഓർത്തു നമിക്കയാണഭിമാന കേരളം;
സാദരമോതുന്ന ഭിവാദ്യമീ,ദിനം.
ആ വില്ലുവണ്ടി മേൽ നിന്നുദയ താരമായ്
കൈരളിക്കൂർജ്ജ പ്രകാശമായ് നിന്നതിൻ
മാതൃകാ ചരിതം പഠിക്കട്ടെയേവരും
മാനവമൂല്യം നിറയട്ടെയാരിലും.
കർമ്മജ്ഞനാം തവ ധർമ്മവിശുദ്ധിയാൽ
നന്മാർദ്ര ജീവിതമനുഭവിക്കുന്നിതാ,
പിൻമുറക്കാർ; തപ്ത നിശ്വാസമാകെയും
മാറിയിന്നേഴകൾക്കാത്മവിശ്വാസമായ്.
കാരിരുമ്പിൻ കരുത്തുള്ള നന്മാർദ്രകം
കാട്ടിത്തരുന്നുദയ ജ്ഞാനാർക്കനായ് സ്വയം
കാത്തുസൂക്ഷിക്ക നാം: അഭിമാന ചിന്തകം
അഭിവൃദ്ധിയോടുയരട്ടെ,യാ ജീവിതം.
ഒറ്റയാൾപ്പോരാട്ടവീര്യമേ,യാരെയും
ഓർത്തു വർത്തിക്കുവാൻ പ്രാപ്തമാക്കുന്നതും;
പാരതന്ത്ര്യത്തിന്നിരുൾക്കാലമാകെയും
പാടേ തുടച്ചുനീക്കീ,യാ പ്രഭാതവും.
അതിക്രൂരമാം അനാചാരങ്ങളാകെയും
ജ്ഞാനമാർജ്ജിച്ചു തകർത്തു മുന്നേറുവാൻ
അശ്രാന്ത പരിശ്രമശാലിയായ്, പുലരിപോ-
ലുദയ ചരിത്രമെഴുതിയീ വഴികളിൽ.
സാധുജനങ്ങൾക്കവകാശ, മുന്നേറ്റ-
മേകി വർത്തിച്ച മഹാത്മാവിൻ: ദിനം
ആചരിക്കുന്നുദയ ചിന്താ പുലരിയായ്;
ആത്മധൈര്യത്തിൻ ജ്വലിക്കും പ്രതീകമായ്.