🌈നാളെ നബിദിനം [5-9-2025]

രചന : അൻവർ ഷാ ഉമയനല്ലൂർ✍️

നന്മതൻ ലോക നേതാവിൻ മഹനീയ-
തിരു ജന്മസുദിനാഘോഷമീ, നബിദിനം
മാനവലോകത്തിന്നേകിയോരുപദേശ-
സാരമായ് തിളങ്ങിനിൽക്കുന്നുദയ താരകം.

അയൽ സ്നേഹ ബന്ധത്തിന്നാഴം പകർന്നേകി,
ആത്മാർത്ഥമാഭയമേകുവാൻ സാദരം
കരുണാർദ്ര ഹൃദയമോടെന്നും വസിച്ചു തൻ
സ്നേഹാർദ്ര മാതൃകയേകിയാ, ഹൃത്തടം.

മാനവിക ബോധമാണുണരേണ്ടതെ,ന്നുദയ
ചിന്താശകലങ്ങളോതിയ നന്മകം;
വ്യർത്ഥമായില്ലിതര ജീവിതങ്ങൾക്കുമായ്-
നൽകിയാ, കരുണതൻ നൽസഹായങ്ങളും.

പുഞ്ചിരിപോലുമൊരു ധർമ്മമെന്നോതിയ
മർത്യലോകത്തിൻ വ്യതിരിക്ത നേതാവിൻ
ചിത്രമില്ലെങ്കിലും ഹൃത്തറിയുന്നു നാം
സത്യസ്മരണകൾ ചേർത്തു വായിക്ക നാം.

അപരന്റെ ജാതി മതങ്ങളല്ലാധാരം;
അനുകമ്പയോടെ വർത്തിക്കുവാനുപദേശം,
ആ ദിവ്യഹൃദയസ്മിതം സദാ സാദരം
ഓർക്കുവാനാകണം ഇന്നുള്ള മർത്യകം.

ആത്മീയമെന്നപോൽ ഭൗതിക ജ്ഞാനവും
ആർജ്ജിച്ചുയരേണ,മെന്നയാ, ചിന്തയാൽ
നന്മോദയം നൽകിയെത്രയോ സോദരർ;
ഉന്നതസ്ഥാനീയരായിതാ, മന്നിതിൽ.

ധ്യാനം മന:സ്സമാധാനം പകരുവാൻ
കരണീയ കർമ്മമാണെന്നു തെളിയിക്കയും
സ്വന്തമായ് രാജ്യമില്ലാത്ത ഭരണാധിപ-
നാകുവാൻ പ്രാപ്തനാണെന്നു തെളിയിക്കയും,

വിശ്വസ്തനെന്ന വിളിപ്പേരിനാൽ ബാല്യ-
കാലംമുതൽക്കുദയ ദീപ്ത പ്രതീകവു-
മായിത്തിളങ്ങിയോരീ, മഹാ സ്നേഹകം
ആർക്കുമേയേകുന്നു പുലർരമ്യ ചിന്തകം.

ഹൃദിസ്ഥമാക്കാൻ ശ്രമിക്കില്ല.നാമിന്നുമാ,
കൂപമണ്ഡൂകങ്ങളായി വസിക്കയാൽ
വായിച്ചുനേടുന്നതില്ല; ജ്ഞാനാമൃതം
ജീവിച്ചിടുന്നൂ; തെളിക്കില്ല മാനസം.

അണിചേർന്നു നിന്നെത്രയായിരങ്ങൾ സദാ-
അഭിമാനമായ്; സർവ്വ സോദരർക്കും തഥാ
ശത്രുവെപ്പോലുമൊരു മിത്രമായ് മാറ്റുവാൻ
തക്ക സിദ്ധിക്കുടമയായി വർത്തിച്ചതിൽ

ലോകനേതാവായി മാറിയോരാദർശം
പിൻമുറക്കാറനു വർത്തിക്കണം ക്ഷണം.
വ്യതിരിക്ത ജീവിതത്തെ നാമറിയണം
നബിദിനത്തിൻ മഹത്വത്തെ വാഴ്ത്തീടണം.

ഹൃത്തുണർത്തുന്നതാം നബിവചനമാകെയും
വൃദ്ധിക്കുവേണ്ടി പ്പഠിക്കാൻശ്രമിക്കണം
കരുണാർദ്ര ഹൃദയത്തുടിപ്പായി നിൽക്കണം
മാനവൈക്യത്തിൻ മഹാമന്ത്രമാകണം.

വരിക സഹോദരാ, ഹൃദയാർദ്ര ചിന്തയാൽ
മഹനീയമായുണർത്തീടാം പരസ്പരം