🍁🍁 ശ്രുതിലയം 🍁🍁

രചന : തെന്നൂർ രാമചന്ദ്രൻ✍️

തുളസിമാലയെനിക്കു തരില്ലെ
ശുഭകരിയായവളേ, രാധേ, നീ
വിലസിതഹാസം നിൻ മുഖകമലേ
ഹൃദയവിരുന്നായ് വിടരുകയല്ലെ
മതിമുഖി തൻ ഭാവുകമഴകിൽ
മുരളിക തന്നഭിമതമായോ
യദുകുല നിറവുകൾ നീ നിന്നിൽ
രമയുടെ മുഗ്ധതയാക്കിയതോ
പ്രണയ പയോധിയിലംബുജമലർ
വികസിത ചാരുത പേറുകയോ
തരളിതയാമംഗന ചുംബന –
രതിരസമോദിനി മധുമതി
പുളകിതഗാത്രി നീ സ്നേഹമയി
ഭുവന വിലാസിനിയെത്ര മനോജ്ഞ
നയന വിലോചന മിഴിവുകൾ
കരകവിയുന്നഴകിൽ രുചിരം
കഥ പറയുകയാണവയനിശം
അനുനിമിഷ പ്രണയാവേശത്താൽ
മൊഴികളിലൂറും മാധവസംപ്രീതം
സ്വരസരോവര സ്വപ്നമരാളം
കളരവ മധുരത്തിരമാലകൾ
ശ്രുതിലയമാ വിശ്വവിപഞ്ചിയിൽ
ചൊടികളിലതി മധുരോദാരം
പ്രിയതരശോണമണിഞ്ഞവളേ
അതിവിമല പ്രണയാംബുധിയിൽ
അരിയ ചുവപ്പിൻ മിഹിരാഗമനം
കരിവളയിട്ടു കിലുക്കിയതോ
കരളിലെ രാഗവിഡംബനയോ
അരുണകരങ്ങളിലുന്മിഷതാശാ
പരിണതി പൂത്തുലയുകയോ
അഭിമുഖ ഭാവോഷ്മള ചാരുത
നിറയുമനന്ത വിമോഹനമായ്
പറയുക പ്രിയസഖി നീയൊരു
വചന സുമംഗള മൃദുപദ്യം