രചന : സെറ എലിസബത്ത് ✍️
എത്ര പെട്ടെന്നാണ് ചില മനുഷ്യർ
വെറും വാക്കുകൾ കൊണ്ട്
മറ്റൊരാളുടെ ആത്മാഭിമാനത്തെ
തകർത്തെറിയുന്നത്.
ഒരിക്കൽ സ്നേഹിച്ചിരുന്നുവെന്ന
ഒരു ചെറിയ പരിഗണന പോലും ബാക്കിവയ്ക്കാതെ,
ഒരുമിച്ച് പങ്കിട്ട നിമിഷങ്ങൾക്കും
പറഞ്ഞ വാക്കുകൾക്കും
യാതൊരു വിലയും കൊടുക്കാതെ
അവർ ചില വാക്കുകൾ എറിഞ്ഞിടും—
ശബ്ദമില്ലാതെ ഒരാളെ അകത്തുനിന്ന്
തകർക്കാൻ കഴിയുന്ന വാക്കുകൾ.
നമ്മൾ ഒരിക്കൽ ഹൃദയത്തിൽ
ഏറ്റവും സുരക്ഷിതമായിടം നൽകിയ
അതേ മനുഷ്യരാണ് ചിലപ്പോൾ
നമ്മുടെ ആത്മാഭിമാനത്തിന്
ഏറ്റവും ആഴത്തിലുള്ള മുറിവേൽപ്പിക്കുന്നത്.
കാരണം അന്യരുടെ വാക്കുകൾ
എപ്പോഴും അത്ര ആഴത്തിൽ മുറിക്കില്ല.
ചിലപ്പോൾ നമ്മൾ വിലമതിച്ചിരുന്ന ഒരാളുടെ
ഒരു വാക്ക് മതി—
നമ്മൾ നമ്മളെക്കുറിച്ച്
വർഷങ്ങളായി വിശ്വസിച്ചിരുന്ന
ചില കാര്യങ്ങൾ പോലും
ഒരു നിമിഷം കൊണ്ട് തകർന്നുപോകാൻ.
ചില മുറിവുകൾ രക്തം ചിന്തില്ല.
അവ ഒരു മനുഷ്യന്റെ ഉള്ളിൽ നിന്ന്
അവന്റെ തന്നെ വിലയെ പതുക്കെ മായ്ച്ചുകളയും.
ഒരിക്കൽ ഹൃദയത്തിൽ
ഇടം നൽകിയിരുന്നുവെങ്കിൽ,
അയാളുടെ ആത്മാഭിമാനം
ചവിട്ടിമെതിക്കാതെ കടന്നുപോകാനുള്ള
ഒരു ചെറിയ മനുഷ്യത്വം എങ്കിലും
നമ്മിൽ അവശേഷിക്കണം.
ഒരിക്കൽ സ്നേഹിച്ച ഒരാളെ
എന്ത് കാരണം കൊണ്ടായാലും
വാക്കുകൾ കൊണ്ട് തകർക്കേണ്ടി വന്നെങ്കിൽ,
അത് സ്നേഹം അവസാനിച്ചതിന്റെ തെളിവല്ല—
ഒരിക്കലും സ്നേഹിക്കാൻ അറിയാതിരുന്നതിന്റെ
ഏറ്റവും നിശ്ശബ്ദമായ തെളിവാണ്…..!!!