📚📚 ഗ്രന്ഥശാല ദിനം. 📚📚📚📚✍️*

രചന : അൻവർ ഷാ ഉമയനല്ലൂർ* ✍️

വിജ്ഞാനവാതായനം തുറന്നേകുന്ന-
യുദയാർദ്ര സുകൃതമാണാ,രമ്യ സ്മരണകൾ
ഹൃദയത്തിലുണരുന്ന വായനാനുഭവം;
അലിവുന്നുദയമാക്കുന്നു ഗ്രന്ഥാലയം.
അനുവാചകർക്കാർദ്ര ചിന്തകൾ പകരുവാൻ
അനുഭവപാഠങ്ങൾ പങ്കുവച്ചീടുവാൻ
ഗ്രാമീണ ബാല്യങ്ങളാഘോഷമാക്കുവാൻ
ചിന്തതൻ ചിറകുകൾ നേടുവാ,നുപരിയാ,
പുസ്തകത്താളുകൾ തൊട്ടു വായിക്കയാൽ
മനസ്സിലായിഷ്ടവസന്തമേകീടുമീ,
ഗ്രന്ഥാലയത്തിന്റെ, ധ്യാന സുഖമറിയുവാൻ
വരികയീ, വിജ്ഞാന വഴികളിൽ സകലരും.
സഹജരേ,നിത്യപാരായണം ചെയ്ക നാം
അറിവിൻ വഴി വിളക്കണയാതിരിക്കുവാൻ
ഇരുൾമൂടി യുവതകൾ വീഴാതിരിക്കുവാൻ
തെളിനീർപ്പുഴപോലൊഴുകി നീങ്ങീടുവാൻ
കാത്തുസൂക്ഷിക്ക,നാം ജ്ഞാനാർക്ക വചസ്സുകൾ
താഴിട്ടടയ്ക്കരുത് ഹൃദയസ്സരസ്സുകൾ.
കാര്യവിചാര സുബോധമേകീടുന്ന
ഗ്രന്ഥാലയത്തിന്റെ ദിവ്യപ്രകാശമാം
യുവജനലോകമേ, പാരായണം ചെയ്ക;
മേലിലുംകരിപുരളാത്തതാം ചിന്തയാൽ
ബാല്യോദയങ്ങളും ലളിതമായ് നുകരുക
നവ യുവ മനസ്സുകളൊന്നായുണരുക.
ജ്ഞാനോദയത്തിന്റെ ആത്മ സംതൃപ്തിയും
ഗ്രന്ഥാമൃതം പകർന്നേകുന്ന നന്മയും
ഗ്രാമാർദ്രഗ്രന്ഥാലയത്തിൻ വിശുദ്ധിയും
വീണ്ടെടുത്തീടുവാനുണരട്ടെ സാദരം;
വിജ്ഞാനപുലരികളുണരട്ടെ സന്തതം….