നാളെ ആവട്ടെ..

രചന : ഷാഹുൽ കാടഞ്ചേരി ✍️

തളർന്ന രാവിന്റെ മടിയിൽ
നേരത്തെയൊന്നു കണ്ണടയ്ക്കണം
നാളെ ആവട്ടെ…
​പുലരി മഞ്ഞിന്റെ കുളിരിൽ
കിളിപ്പാട്ടിനൊപ്പം അല്പം നടന്നു താളമിടണം
നാളെ ആവട്ടെ…
​പ്രപഞ്ചരഹസ്യങ്ങൾ ഒളിപ്പിച്ച പച്ചിലകളിൽ
ജ്ഞാനത്തിന്റെ പുതിയ വെളിച്ചം തിരയണം
നാളെ ആവട്ടെ
​അക്ഷരച്ചെപ്പ് തുറന്നുതന്ന പഴയ വിദ്യാലയമുറ്റത്ത്
ഒന്നുകൂടി ചെന്നുനിൽക്കണം
നാളെ ആവട്ടെ
​ആത്മവെളിച്ചമേകിയ ഗുരുപാദങ്ങളിൽ
പ്രണാമപ്പൂവുകളർപ്പിക്കണം
നാളെ ആവട്ടെ
​ഉമ്മറക്കോലായിൽ തഴുകുന്ന
പ്രഭാതക്കുളിരിലേക്ക് മനസ്സു തുറന്നിടണം
നാളെ ആവട്ടെ
​അടുക്കളത്തോട്ടത്തിൽ കുറച്ചു ചീരയും വെണ്ടയും
നട്ടുനനച്ചു പച്ചപ്പുണ്ടാക്കണം
നാളെ ആവട്ടെ
​കൈക്കോട്ടെടുത്ത് തട തുറന്ന്
തെങ്ങിൻചുവട്ടിലേക്ക് ജീവന്റെ ജലമൊഴിക്കണം
നാളെ ആവട്ടെ
​കാലം ചോരയിൽ കലർത്തിയ തീക്ഷ്ണരോഗങ്ങളും
ധമനികളിൽ നിശ്ശബ്ദം പടരുന്ന നഗരവിഷങ്ങളും
വൈദ്യന്റെ കണ്ണാടിയിലൂടെയൊന്നു പരിശോധിക്കണം
നാളെ ആവട്ടെ
​രക്തബന്ധങ്ങളുടെ ഊഷ്മളതയിലേക്ക്
ഒന്നുകൂടി തിരിഞ്ഞുനടക്കണം
നാളെ ആവട്ടെ
​ഉടപ്പിറപ്പുകളോട് കൂട്ടുകാരോട്
വഴിയരികിൽ നിൽക്കുമ്പോഴെങ്കിലും കുശലം പറയണം
നാളെ ആവട്ടെ
​വീട്ടുപടിയ്ക്കൽ കാത്തിരിക്കും ഭാര്യയോടും മക്കളോടുമൊപ്പം
ഹൃദയം തുറന്നൊന്നു പൊട്ടിച്ചിരിക്കണം
നാളെ ആവട്ടെ
​പാടവരമ്പിലെ പഴയ കൗതുകങ്ങളിലേക്ക്
ഒരു കുട്ടിയായി മടങ്ങണം
നാളെ ആവട്ടെ
​പ്രഭാത കിരണങ്ങൾ മുഖത്ത് പതിഞ്ഞിട്ടും
അയാൾ മാത്രം ഇന്നുണർന്നില്ല…
​ആരോ പതുക്കെ മന്ത്രിച്ചു,
ഇന്നിന്റെ മിഴിയടഞ്ഞു…
“നാളെയാണത്രേ…”