🌄 ഉദയകാവ്യം 🌄

രചന : അൻവർ ഷാ ഉമയനല്ലൂർ✍️

ഉദയകാവ്യംരചിക്കുന്നതാം കാലമേ,
നന്മതൻ തൂവെളിച്ചത്തിൻ മഹത്വമേ,
പുലരികളേകിത്തെളിക്ക!യീ, നന്മാർദ്ര-
ഗ്രാമീണഭൂമികയ്ക്കഭയമായ് മാറുക.
കാതരഹൃദയങ്ങളിൽ വിളങ്ങട്ടെനിൻ
കാഞ്ചനവർണ്ണ പ്രതീകമാം നന്മകം
ഉദ്യാനസാമ്യം തളിർക്കട്ടെ മനസ്സുകൾ;
ഉന്മേഷമേകിത്തെളിക്കുകാ,ക്കരളുകൾ.
ആകല്യമില്ലാത്ത കാലത്തിലെങ്കിലും
ആശങ്കയോടെ തപിക്കയാണാർദ്രകം
ആഗ്രഹിക്കുന്നുദയ,സൗഭാഗ്യസൂചകം
ആദിത്യസാമ്യമുണരുന്ന കാവ്യകം.
ആന്ദന്ദദായികയാം സുപ്രഭാതമേ,
ആത്മവിശുദ്ധിയേകുന്നതാം നാളമേ,
നീളേ വിളങ്ങുമാ, കനകമയ ഭംഗിതൻ
കരുണാർദ്രരൂപം തെളിയുന്നകമെയും.
താഴത്തുനിന്നുദയ,ലക്ഷ്യത്തിലേക്കുനിൻ
യാത്രയൊന്നോർക്കുകമാത്രംമതിയെനി-
ക്കാദിത്യമാനസത്തിൻ ശക്തിയറിയുവാൻ
ആചന്ദ്രതാരമീ, മണ്ണിൽ വസിക്കുവാൻ.
വിസ്മയ ചിത്രമായ് നിറയുകീപ്പാരിതിൽ
സുസ്മിത ഹൃത്തുമായുണരുകീപ്പുലരിയിൽ
നിസ്തുലാനുഗ്രഹവർഷമേയറിയുന്നു
വ്യതിരിക്ത രമ്യ കിരണമായ് തിരുവരം.
ആദിത്യഹൃദയമുണർത്തുന്നനുദിനം
ആ-ദിവ്യസ്മരണയേകുന്നുദയ മാനസം
ആത്മാവിലറിയുന്നഭയാർദ്ര കരതലം
പ്രഹ്ളാദഹൃത്താൽത്തെളിപ്പൂ; പ്രദീപകം.
ഉചിതരൂപത്തിൽനീയണയുക; കാലമേ,
തങ്കലിപികളാൽ രചിക്കുദയ ഹൃദയമേ,
ധന്യശീലന്മാർപ്പിറന്നയീ, മണ്ണിതിൽ
നിർണ്ണയമുന്മേഷഭരിതമായ് വാഴുക.
താഴ്ന്നുപോകാതെ കാത്തീടുക; ചിന്തകം
നിത്യമുഷസ്സന്ധ്യ പോൽത്തിളങ്ങട്ടെ സന്തതം
ഹൃത്താൽത്തെളിക്കാം മഹാസ്നേഹ പാർവ്വണം
സ്മരണീയമാക്കുക; മഹിയിതിൽ ജീവിതം.💖🌈💖🌷🌈💖