രചന : കുര്യൻ വൈദ്യൻ ✍️
രാത്രിതൻ മാറിൽ മയങ്ങുന്ന നേരം
കാതിലായി പെയ്യുന്ന നിഷ്ഠൂര ശബ്ദം
നിശ്ശബ്ദതതൻ കവിളുകളിൽ തട്ടി
ഉറക്കത്തെ നിഷ്കരുണം കൊത്തിപ്പറിക്കും.
എവിടെയോ ഇരുട്ടിൽ ഒളിച്ചിരുന്നുകൊണ്ട്,
പാട്ടെന്ന പേരിൽ പടർത്തുന്ന ശല്യം
മറ്റുള്ളോർ തൻ സുഖസൗഖ്യങ്ങളെല്ലാം
ചുട്ടു കരിച്ചതിൽ ആനന്ദമേൽപ്പിക്കും.
ചില മനുഷ്യരുമുണ്ട് ഈ മണ്ണിൽ
ചീവീടിൻ സ്വഭാവം തലയിലേറ്റിയോർ
മറ്റുള്ളോർ ചിരിക്കുന്നത് കാണുമ്പോൾ
ഉള്ളിൽ കനലെരിഞ്ഞു നീറുന്ന കൂട്ടർ.
സ്നേഹത്തിൻ പുഞ്ചിരി മുഖത്തു അണിഞ്ഞും
വാക്കിൽ വിഷത്തിൻ തുള്ളികൾ വീഴ്ത്തിയും
സന്തോഷങ്ങളെ വെട്ടിമുറിച്ചു മാറ്റി
വികൃതമാം തൃപ്തിയിൽ ആറാടുമവർ.
ഇരുളിൻ ആഴത്തിൽ മറഞ്ഞിരുന്ന്
ഇരുട്ടുതിന്ന് മനം നിറഞ്ഞവരിവർ
ചീവീടിൻ നിർത്താത്ത കരച്ചിൽ പോലെ
എന്നിലെ സ്വസ്ഥത നശിപ്പിച്ച് രസിച്ചിടുന്നു.
