ആശ . . .

രചന : ജയശ്രീ രാജേഷ് ✍️

ചില ദിവസങ്ങൾ
നമ്മളെ തോൽപ്പിക്കുന്നത്
വലിയ ദുരന്തങ്ങളിലൂടെയല്ല . . .
രാവിലെ എഴുന്നേൽക്കാൻ
തോന്നാത്തത്ര നീണ്ട രാത്രികളിലൂടെ,
പറയാൻ വാക്കുകളില്ലാത്ത
ചില വാർത്തകളിലൂടെ,
തിരികെ വിളിക്കില്ലെന്ന് അറിയുന്ന
ചില നമ്പറുകളിലൂടെ . . .
എന്നിട്ടും,
അടുത്ത പ്രഭാതത്തിൽ
ജനലുകൾ തുറക്കപ്പെടും . . .
പുറത്തെ കാറ്റ്
അകത്തേക്ക് കടന്നുവരും . . .
ഒന്നും മാറിയിട്ടില്ലെന്ന്
അറിയാമെങ്കിലും,
ഇനി ഒന്നും മാറില്ലെന്ന്
വിശ്വസിക്കാൻ
മനസ്സ് തയ്യാറാകില്ല . . .
അവിടെ,
“ഒരുപക്ഷേ . . .”
എന്ന് മനസ്സ്
പതുക്കെ വീണ്ടും പറയും . . .
എല്ലാം ശരിയാകും എന്നല്ല . . .
എന്ത് സംഭവിച്ചാലും
നാളെ വീണ്ടും തുടങ്ങാൻ
നമ്മളെ ജീവിപ്പിക്കുന്ന
ആ ചെറിയ കാരണമാണ് –
ആശ . . .